احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Friday, November 7, 2008

اوباما جانا و فرحنابو


اول انتخابات امريكية متشدنيش اني اتابعها مع انها كانت مثيرة للجدل جدا
سيده و افريقي امريكي و مخرف احمق مسكين
يعني ولا السيرك الروسي
ليه مشدتنيش؟؟ لان بوش سايبها موحلة ابشع مما يتصور اي حد و اللي حيجيي بعده لازم يكون يا ولي من اولياء الله الصالحين او ديفيد كوبرفيلد

اولا عمري ما سمعت عن اوباما غير لما بدى يرشح نفسه
يعني قبل كدا كنا المفروض نسمع عنه لكني مش فاكرة اني سمعت عنه بقوة الا لما بدى يرشح نفسه
ما علينا
و ظهر اوباما و بدى يلعب من اولها صح جدا
بصراحة مكنتش متوقعة فوزه خالص من اول انتخابات الحزب نفسه ولغاية دلوقتي
ليه؟؟
اولا لانه افريقيي و امريكا لسه فيها عنصرية
و حتى الافارقة اللي وصلوا فيها لمناصب حشاشة مكنوش اي شئ غير اسواء من اقرانهم البيض تتبعا لمبدا اذا كنتوا فاكرني ححابي اهلي و خلاني فده بعدكوا
انا اول واحد حيطلع عنيهم و يذلهم
و اي نعم لا كولن باول و لا كندرةليسا اضطهدوا السود بس الفكرة انهم كانوا ابشع ما يمكن تعيينه من سياسيين و عسكريين

ثانيا كنت فاكرة انه و بمجرد اطلاق التسميات المعتمدة رسميا في امريكا لانزال ابشع انواع التنكيل باي حد اعلاميا حتنفع في انها تهز صورة اوباما قدام المجتمع الامريكي
فشوية طلع اوباما مسلم متنكر في صورة مسيحي
و شوية طلع متربي في بؤر الارهاب الجديدة زي ماليزيا و اندونيسيا
مع ان البؤر دي من 47 سنة مكنتش موجودة
فمش عارفة هل هو انشاءها و رجع امريكا و لا الناس بتحاسبه على زمان حسب غلطات دلوقتي، بصراحة مش عارفة؟؟؟

ثالثا
انه مالهوش اي خبرة سياسية بالمعنى الواسع
يعني بالنسبة لي هيلاري تفهم عنه دشليون مرة
و ده لا سمح الله مش تعصب مني لكونها ست
لكن لان دي فعلا واحدة بتفهم و ووعرة سياسيا ، داخليا و خارجيا، فالشعب كان حيضمن انه داخليا حتتم اصلاحات مطلوبة و اساسية و خارجيا كنا حنشوف واحدة عارفة الوضع الحالي عامل ازاي و اتعاملت معاه
من قبل كدا اولا بحكم كونها زوجة لرئيس امريكي سابق
و كونها سياسة من بعده حتى الان
و لانها حتى وقت وجود بعلها كرئيس كانت ملمة معاه بمواضيع كتيرة و يقال انها كانت بتشاركه في الكثير من قرارته
لكن اوباما ده طلع لنا كدا من حيث لا نحتسب، اي والله
و مع ذلك كسب
و بنجاح ساحق انا شايفة انها كانت دعوة امه في ساعة
مغربية
و ظروف تانية كتيرة هي اللي ساعدته زي مثلا ان الناس بعد 8 سنين عجاف كانوا قربوا يكفروا من عيشتهم و من بوش و من الحزب الجمهوري
فقالولك لا كفاية حرام
لانها لما توصل ان ولاية زي فيرجينا اللي عمرها ما صوتت لمرشح ديموقراطي من سنة 1964 تصوت لاوباما اللي مش بس ديموقراطي
لا
ده كمان اسود و يقال انه مسلم
يعني ليست واحدة و لا اثنتان
بل ثلاث قوة فعالة
اللي ميعرفش
ولاية فرجينيا دي
اغلبها جمهوريين من ابو يطلع يصطاد غزلان لزوم التسلية و مرورا بامتلاك اول مسدس في سن صغيرة كعلامة على الرجولة و الحياة الامريكية الحقيقة
نفس الولاية دي متعصبة دينيا و ضد المسيحين نفسهم يعني مثلا لو عدت واحدة كاثوليك بيكون شكلها مش ظريف و بيشنعوا عليها و تبقى غير مرغوب في صداقتها نوعا ما
اغلبها بروتيستانت متشددين اوي و بين الكنسية و الكنيسة كنيسة
و كمان اغلبها بيض متعصبين ضد السود
و شفت بعيني محدش قالي ازاي لسه الاسود اقصى طموح يوصله انه يشتغل موظف ملفات و بس
و اغلبيتهم يا اما عمال نظافة او طباخين
او جامعين قمامة و ظباط شرطة
يعني فيها كذا نوع تعصب مضاد لكل ما يمثله اوباما
فمؤكد بوش ضرره باتع و خلى الناس تقول
نار الديمقراطي و لا جنة الجمهوري
الاسباب اللي ساهمت في انجاح اوباما كتيرة
اولها غلطات الطرف الاخر سواء كانت هيلاري او ماكين
هيلاي غلطتها انها صرحت بانها حتغير حاجات في نظام الادوية و النظام الصحي و التامين في البلد و لان امريكا دولة مؤسسات مش حكومات فالقائمين على مؤسسة الصحة و الدوا و بيعبوا منها فلوس قالولك الولية دي متلدش على البيت الابيض ابدا
كمان ماكين محتارة اصلا اقول انه عمل حاجة اصلا، في رايي صديق ليا انه متمش انتخابه غير لانه ابيض البشرة و محافظ و بس خلاص
و ده صحيح
ماكين كان باهت
لا لون و لا شخصية و لا عارف فين ربنا حاطه و وشه كان دايما بيظهر كانه متفاجئ انه واقف بيخطب قدام ناس
والله ده شعوري اي مرة افتح التي في و اشوفه
زي متفاجي كدا او اخدوه على خوانة


نيجي بقى لبقية تمثيلية اوباما و العوامل الاخرى الملازمة ليها
خطبه كانت قوية اوي بفضل كاتبها اللي هو نفسه كاتب خطب كينيدي الله يرحمه و يبشبش الطوبة اللي تحت راسه
و غير ان اوباما عنده كاريزما مفقودة عند ماكين و لكن من امتى الكاريزما لوحدها تكفي؟؟ ما ناصر كانت عنده كاريزما، عملنا بيها ايه؟؟؟ كل خير، كل خير الصراحة

كمان اخر فترة في حملة اوباما كانوا ماشيين ولا الملبن
اكتشاف محاولة لاغتياله من قبل ناس بيض و دي ضرب بيها سرب عصافير كانوا بيهاجروا
واحد لانه خلى البيض يخافوا و يتكسفوا على دمهم و يقلولك احنا عشان نحسن صورتنا حنصوت له اهو نغطي على عملة العيال الهبل دول
ثانيا اوباما بالحركة دي اتبع تكنيك ابن فلاتة ميخرش المية مفاداة ان اي رئيس ممكن يخسراو بيكون عنده شك انه مش ماسك الحكم بيد من عز الدخيلة، بيعمل محاولة اغتيال فاشلة بحيث ميموتش فيها بجد و لكنه بيكون حصل على تعاطف و تاييد و حتى اشرس معارضينه بيخليهم يكزوا على سنانهم لانه خلاص بقى معاه كارت بلانش انه يمرح كيفما شاء
اتفرجوا على فيلم المترجمة لنيكول كيدمان و شين بين
و اللي مش بيتفرج يفتكر محاولة اغتيال ناصر في المنشية و مبارك في اديس ابابا و ريجان على ناصية الشارع
لانه لما بتكون محاولة الاغتيال صحيحه و هي يجب ان تكون كذلك عشان بيكونوا خلاص مش عارفين يفكوا من حكم الرئيس بتكون المحاولة ناجحة و بيموت بالفعل ،زي مثلا كنيدي و السادات، سمعتوا عن رئيس او زعيم مصري تاني اغتيل؟؟
او رئيس امريكي في العصر الحديث غير كينيدي اتقتل بابشع طريقة زي ما هو مات؟؟
كمان جت حكاية عيا جدته في بداية الاسبوع الاخير و كانت جوا الجون و كملها اوباما انها اتوفت قبل يوم التصويت بيوم و الاعلام صوره و هو بيبكي و بيمسح دمعته و اتنشرت الصورة دي، طيب احنا ايش عرفنا انها مامتش قبلها بشهر مثلا و رئيس دعاية حملته خبى الخبر و نشره في الوقت الصح؟؟؟؟؟؟؟؟ ايش ضمنني؟
يعني اوباما قالك تعاطف انساني حكسب
تعاطف احراجي حكسب
تعاطف من اجل اتعاطف حكسب
حتى اللي بيكرهوني حخليهم يكسبوني
و حتى اللي مش حيصوت حخليه يصوت
منسيش هو اي قطاع
و على سيرة الاعلام فمنقدرش ننكر ان دور الاعلام معاه كان له اكبر اثر في اظهار بصورة افضل ما يمكن شراءه من تبغ
مقولة من نفس الصديق بتقول ان اوباما اصلا مشروع بيعد له من زمان اوي
يعني دخوله جامعة هارفارد و مساعدته لبلوغ السلك السياسي في امريكا و كل الباكدج دي متوضبة من زمان و حان قطافها مش اكتر ولا اقل



الجميل في الموضوع بتاع انتخابات امريكا هو احنا، احنا العرب فالمسلمين، والله احنا شعوب مسخرة، تحف متحنطة
ايه ام الهبل اللي اتعاملنا بيه مع الموضوع ده؟؟
قال يعني اوباما لما يسمك الحكم حيدينا نصيبنا من الورثة اللي راحت علينا، او انه مثلا حيغير قوانين الجنسية و يمنحها للعرب و المسلمين مجانا و بلاش و نغزو امريكا بقى ما هي خلاص عزبة بقايا الفتح الاسلامي الرشيد
او انه مثلا حنلاقي اوباما ركب طيارة هليكوبتر و بصينا لاقيناه بيحط حطاطه على سقف الكنيست الاسرائيلي و ماسك مدفع رشاش و بوم بوم ديش و تتتتتتتتاك و هاتك يا رصاص على راس اولمرت او البت الجديدة دي مش فاكرة اسمها ايه
او انه مثلا حنلاقيه في يوم بيقدم على فيزا للحج و جاي هو والمدام
بجد انا حاولت اكتب بشكل جدي جدا
بس كل ما افتكر اللي قريته من تعليقات عند بعض السادة المدونين او تعليقات الناس في مواقع اخباريه حاجة تفطس من الضحك
بجد حاجة استبحس جدا
و لا ايه، اه فكرة انه يهودي ابن ستين كلب و راح يزور اسرائيل و كمان الجملة المشهورة " لما نشوف الحقير ده حيفضل يتعامل مع اسرائيل و لا ايه"
ما هو طبعا حيفضل يتعامل معاها
يعني دي كأن الناس بتقول ان الرئيس مبارك قرر يشن العدوان على محافظ اسوان
فزي ما محافظة اسوان دي من بقية القطر المصري
فاسرائيل هي ولاية اخرى من ضمن ولايات امريكا
فمش فاهمة يعني انتوا مستنظرين ايه من امريكا بخصوص علاقتها مع اسرائيل؟؟
تقلها اسفه مخصماكي و سحلانة منك مش حتلمك؟؟
هههههههههههههههههههههههههههههههههههههههههه
لا طبعا
ولا حتعمل اي حاجة
و كمان اعتراض الناس على لبس اوباما او غيره للقبعة او البتاعة دي اليهودي وقت زيارتهم مالهوش اي مبرر، طيب ما احنا لما بيزورنا مسؤول اجنبي بنلسبه العمة و بنلبس مراته الحجاب، خلاص خالصين يعني كل واحد يلبس ضيوفه و نقلبها حفلة تنكرية
عادي خالص و سواء لبسناه العمة او شلحناه العمة حيفرق ده في ايه؟؟ هل حيحل القضية الفلسطينية في شئ؟؟؟؟؟
مظنش

و على صعيد اخر
ناس كتير اوي فرحانة ان اوباما كسب
الناس دي فيه منهم امريكان من اصول افريقية و فرحانين عشان هو افريقي و ده طبيعي و لهم حق فيه
و ناس من ناشطي حقوق الانسان و شاركوا في المارشات اللي حصلت وقت الستينات و ده بالنسبة لهم نصر و حلم بيتحقق و برضو لهم حق
ناس تانية مبسوطة ببساطة لانهم اتكووا بنار بوش و التمن سنين المسخرة بتوعه
لكن فيه ناس مالها في التور ولا الطحين منشكحين اوي ان اوباما هو اللي كسب و كأن مكسبه حيفيدهم هما بشكل مباشر او كانهم اصلا مواطنين امريكين و صوتوا في الموضوع من اساسه او حتى كانهم عايشين هناك
و ناس من التجمعات الاشتراكية و الماركسية فرحت اوي انه فاز لانهم صدقوا الاشاعة اللي بتقول انه ذو ميول اشتراكية شيوعية، طيب يعني عيب اوي
بجد عيب
بقى امريكا اللي اصلا اي مواطن عادي له شوية ميول يسارية مش حتى اشتراكية و لا شيوعية بيكونوا حاطين عينهم عليه ولا الام اليهودية لما تراعي عيالها
و لو حسوا انه اشتراكي بيكون مفتوحله ملف مع امن الدولة بتاع هناك و بيكون حالة واقف خالص
بتوصل في احيان لمرحلة مافيش شغل
مافيش وظايف
مافيش امان
يقوم الواد اوباما يخمهم و يخش في مجلسهم و يترشح في حزبهم و يلبس لبسهم و ياكل اكلهم كل ده و هما مش عارفين انه اشتراكي او شيوعي؟؟
يعني دي واسعة حبتين شوية
ده خيبة ايه دي اللي حتى السي اي أيه بتاعهم معرفش يتوصلها؟؟؟؟

طبعا فيه مسلمين شموا ريحة انه كان مسلم فقالك بس
هو ده اللي حيمسك قسم الدعوة و الارشاد و شوف انت لما رئيس اكبر دولة عالميا يمسك لك القسم ده حيعمل ايه يعني قنابل جاهز
متفجرات جاهز
حروب زي ما انت عاوز جاهز
يقبض على اعداء الله حاضر
و تنقلب الايه و فيه موقع بعض المعلقين كانوا كاتبين كلام من نوعية لما نشوف سي اوباما حيعمل ايه عشان يحسن صورة الاسلام و المسملين بعد اللي عمله بوش، الله يعني حتى تحسين صورة الاسلام سايبنها لمرتد عليه اللعنة؟؟؟؟
يعني مافيش اي حد عاوز يعمل حاجة خالص؟؟ كله جهاد من على شاشات الكومبيوتر كدا؟؟
كله شغال تنظير و فسلفة و مناظرات و بتاع كان البيت الابيض اخر الشارع؟؟؟

نهاية، اوباما جانا و فرحنابو بعد غيابو و لما نشوف
اصله يا اما زيه زي اي رئيس امريكي حيمشي على نفس الاجنده الرسمية و الغير رسمية لامريكا اللهم الا في شوية حاجات حيغيرها او انه لو قرر القيام بعمل تغييرات اصولية جسيمة فنهايته حتكون بشعة يا مسعودي
فالسؤال هو هل اوباما حيتم الشروع في ناوي يغير حاجة خطيرة في طريقة الحكم الامراغتياله ويتم انتهاء الامر بمحاولة فاشلة
او بمحاولة ناجحة؟؟
و ممكن اطلع غلطانة و يموت موته طبيعية بس دي معناها انه مش ناوي يغير حاجة خطيرة في طريقة الحكم الامريكي


Favorite quotes


"
What kind of national security do we have when we have been robbed of all leaders??
What national security that permits the removal of fundmental power from the hands of American people and validates the senates to an invisible government of the united states

That kind of national security gentlemen and jury is when it smells like it, feels like it, and looks like it, we call it what it is, fascism.


"
American naturalist wrote: a patriot must always be ready to defend his country against its government.
"

10 comments:

Unknown said...

عجبني تحليلك
لما أحفظها في دليشبوز عشان أقراها على رواقة بعد كده

Empress appy said...

ايوة منتظرين مين وايه وليه ولا شاغلنى بجد كل ده وبيعت لمصر مندوب ليه مندوب يقابل الريس يالا العار يععععععععععع

الأغاني للرأفتاني said...

نجاح اوباما هو نجاح للديموقراطيه الامريكيه داخليا. يعنى الشعب الامريكى المفروض يهنى نفسه لانه انتخب اوباما واثبت انه مش شعب عنصرى
والانتخابات الامريكيه زى انت ما قولتى موضوع خاص بامريكا
الشعوب اللى مستنيها ان اوباما يحررها او يمنحها حريه متستهليش انها تعيش اصلا
والحكومات العربيه الفاسده هى اللى خلت كل الشعوب تركبها وتددل رجليها
الامريكان فرحانين لانهم انتخبوا رجل هو الافضل فى نظرهم رغم انه من اصول افريقيه واثبتوا انهم بيبصوا للمضمون قبل الشكل

وانا دايما كنت باقول للناس العرب اللى شاغله نفسهم بالانتخابات الامريكيه اصلحوا نفسكم الاول وبعد كده لا هتحتاجوا لا اوباما ولا راغب
علامه

وبالنسبه لاسباب نجاحه اللى انتى كتبتى عنها فالسبب الواقعى الوحيد هو ان الشعب هنا طلع دين امه من بوش وايامه السواد ولذلك الكل انتخبه بما فيهم ولايه فريجنيا

عقبال ما نشوف فى بلادنا رؤساء من الاقليات وديموقراطيه حتى لو نص نص

==================
خالد بيسلم عليكى وبيقولك لما تيجى زياره هيعرفك باشرف
ههههههههههه

جبهة التهييس الشعبية said...

يا اوختشي ده واحد كتب يقول نصر اوباما هو نصر للاسلام
عاااااااااااا
انبي تعوض عليا عوض الصابرين يا رب

Anonymous said...

ايهاالسيدات والسادة

دعوا فسحة للأحلام قليلا .. فمعظمهم سيفيق على لاشئ ..أوباما لديه كما قلتى اجندة تنخخ جمل .. ومعظمها داخلية .. يبقى ازاى هايقدر يبص لبرة؟

ذو النون المصري said...

كتبتي دا كله لاجل عيون اوباما؟؟؟؟
علي فكره
انا اول ما الراجل ده قرب ينجح و خلاص استطلاعات الراي رمت حمولها عليه قلت الراجل ده هيموت قتيل او علي الاقل له اربع سنين بس
لان قدامه مشاكل كتير جدا جدا جدا و لا اعتقد انه هيقدر ينهي كل المشاكل دي في اربع سنين
بخلاف ان نيته للتغيير اذا كانت في الاساسات هيموت هيموت لان فيه ناس اصلا حاولت تقتله و جايز يكون فيه غيرهم
................
بالمناسبه
ازاي يفوز ب400 صوت مقابل 150 تقريبا
هو التصويت هناك شكله ايه
مش الشعب بيصوت كله و للا ايه؟؟؟؟؟؟

^ H@fSS@^ said...

طارق باشا
يشرفني ان التحليل يعجب حضرتك اتفضل اهلا و سهلا


ابي بتنجاني
مين ؟ فين؟ ليه؟؟
مفهمتش عاوزة تقولي ايه؟


رافتاني باشا
انا مبقولش ان الشعب الامريكي اللي حضرتك منه مش ناجح ديموقراطيا
انا بقول ان نجاح اوباما مش بس بسبب ظروفه هو لوحده
حاجات كتيرة ساعدته
ليه؟
انا بالنسبة لي لو ده مرشح افريقي من مجل سالشيوخ
حتوقع انه حيتقدم للترشيح جوا حزبه مرة و اتنين لغاية ما يوافقوا عليه
و لما يوافقوا عليه حيترشح للرئاسة مرة و اتنين و عشرة و الف لغاية ما يوافقوا عليه كرئيس
لكن هي ظروف و ادت لانه يكسبها سخنة مولعة من ايد الخباز بالشكل ده
و زي ما كتبت جزء منها بسبب غراب البين بوش لانه نيلها اوي فخلى اي حد حيجيي بعده كان حيكسب
اي كان مين
ان شاء الله انا بنفسي رحت و اترشحت كانوا حيقبلوني

فهي دي الفكرة
اوباما كان زي نقطة مطرة من بعد سنين جفاف
طبيعي حيتشربوها مهما كان


تحياتي للجميع

^ H@fSS@^ said...

نوارة
لو جت على تعليق اللي كاتباه فهانت
لكن انا شفت حاجات
تقوليش اشتروا اوباما بفلوسهم؟
ربنا يعوض علينا كلنا


استاذ شريف
انا مش عاوزاه يبص لبرا او جوا
عاوزه بس يتقي ربنا فينا و يسحب جيوشه من العراق و كفاية حكون شاكرة لو عمل الحركة ديو اعتقد لو عملها مش بعيد تكون اخر شئ يقوم بيه و يتقتل بعدها
ربنا يرحمه من دلوقتي



نون
مالك يا خويا مستكتر عليا الكتابة ليه؟
انا بكتب من بعد غياب حتى
الله اكبر الله اكبر
الموكف يستحك الكتابةو التحليل
نقول للمخيخ ميفكرش يعني

انا بهزر لحسن متكونش فاهمني
انت شكلك الجواز علمك الانتخة
هههههههههههههههههههههه
بالنسبة لموجموع الاصوات اللي انت مستغرب منه فهي مش بمعنى ان خمسين مليون انتخبوا و تلاتة مليون انتخبوا ماكين
هي حسبة معقده اوي عندهم و بيبقى نظام كدا تلاكيكي شوية و مش مستقيم لكن دي انتخابات مافيش شك ف ينزاهتها مش زي بتاعت بوش
و نفس ماكين اقر بالهزيمة

معلش
هاردلك


تحياتي للجميع

فارس عبدالفتاح said...

على فكره باين من الفيديو الذي اسفل الموضوع انك من النوع الذي يتأثر بالمؤثرات السمعية والبصرية وبالتالى الحرية .

طبعاً عجبك حركات كيفن كوستنر في المرافعة التى يقوم بها مع ذلك لم تتأثري بالمؤثرات الحركية التى كان يقوم بها ايزون هور او ريجن او اهود اولمرت وغيرهم .


وقد اثر عليك السادات بطرقته الفهلوية التى يوجد بها غلط الحقائق والنصب والتغفيل لغير المثقفين الحقيقيين وجن كندي الذي كان يمثل الرجل الابيض الاميركي والقومية الاميركية .

ولم تتأثر بالقومية العربية وعبدالناصر .

فعلا شيأ غريب ..


للعلم والاحاطة :

http://www.aljazeera.net/NR/exeres/12149920-0C18-4F00-B87C-4B2765DF1318.htm



http://www.aljazeera.net/NR/exeres/A707EC43-E1D4-4367-922A-2F3B1ABF45C0.htm

مع خالص الشكر والتقدير

^ H@fSS@^ said...

فارس
احب انك تترجملي ايه نص الحوار اللي ورد في الكليب، ايه رايك؟؟

لو ترجمته ممكن نتناقش من غير قلة ادب و جليطة سافلة من ناحيتك
لو مقدرتش تترجمة و تفهم معناه فحقولك تخرص خالص بعدها و تسكت و متهوبش ناحية البلوج
ماشي؟؟
مفهوم النقطة دي و لا غباءك المعهود حيفضل مسيطر عليك و مخليك مبقوق مني لغاية امتى؟؟
عيب المفروض انك راجل
فتعامل مع الناس على اساس انك راجل
و شكرك مش مقبول و لا عاوزة منك تقدير
لانه مش معقولة تكون داخل قالل ادبك و بعدها تمحلسلي بكلمتين فاكر انك ممكن تضحك بيهم عليا

اللهم طولك يا روح على ما ابتلاني بيه ربي