احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Thursday, November 13, 2008

قالك ايه؟؟ قالك حللم بللم!!! شفنا عجبا


قالك ايه قالك حوار الاديان
برعاية مين؟؟ الملك المبجل عاهل السعودية و خادم الحرمين الشريفين و مبوظ عليا يومي
قالك ايه؟ قالك حوار للاديان و كمان في نيويورك يدعو فيه الملك لزيادة نسبة التسامح في الدم ووقف الارهاب الذي يعتبر عدو لجميع الديانات (الحب حلو حلو و الهجر دح دح)
قلتو ايه؟ قلتلوا يا ريتك كنت قعدت في بيتكم و قلت الخطاب ده في المراية لنفسك ووراك عصبة الشيوخ المنفسقة
قالك ايه؟ قالك ان الاديان التي اراد بها الله اسعاد البشر لا ييجب ان تكون سببا في شقائهم
قلتلوا انا ايه؟؟ طيب و العشرميت مصري و غيرهم من جنسيات اخرى اللي بيتعذبوا عندكوا لاتفه و احط الاسباب؟؟
قالك ايه؟ قالك ان الصراعات على مر العصور سببت حروب مدمرة و سالت فيها دماء كثيرة
قلتلو ايه؟ ما هو كله بسبب يا حضرت معاليك و ممكن يكون بسبب الشخوخ اللي انتوا مصدرينهم في شرق الكرة الارضية و غربها و ناشرين فيها غسيلنا الوسخ
قالك ايه؟ قالك بان كي مون و بيريز وصفوا خطابه بالمهلم (وسمعني سلام لابو سوسو)




الالهام


قالك ايه؟ قالك بيريز بيقول للملك نفسي صوتكوا يبقى هو اللي غالب، طيب اشرب يا حبيبي، اشرب انهار العسل و الخمرة و اللبن الحرير


طنط ملهمة


قالك ايه؟ قالك سيادة الملك قال عبارة ملهمة طحن و روشة اوي مفاداها " ان الانسان و شريكه الانسان على هذا الكوكب فاما ان يعيشا معا في سلام و صفاء و اما ان ينتهيا بنيران سوء الفهم و الحقد و الكراهية"

قلتلوا انا ايه؟ طيب يا حضرتك مين اللي زرع بذور الحقد و الكراهية و سوء الفهم و تكفير الاخر و قتل من لم يتفق معاك في الراي؟؟ مين اللي نشر احط انواع الفكر و ساعد على تشوية صورة الاسلام و اكد على انتشار معلومات اندفنت من زمان و جيت انت طلعتها و منجهتها و نشرتها؟؟
مين يا سعادة العاهل و الخادم للحرمين؟؟
مين اللي بيمول كا ما هو مسئ للاسلام و للرسول و للمسملين و يرجع يشتكي؟؟
و لما انت يا ملك السعودية كنت عاوز تعمل مبادرة للاديان من كام سنة مع بابا الفاتيكان، ليه لما طلب انك تبين حسن نية لبناء كنيسة رفضت؟؟
و ليه لما انت عاوز تعمل حوار اديان مع الناس كلها لكن ناسي قطاع من اهل بلدك و هما يمكن اولى بيها منك كمان و مضطهدهم و مطلع عنيهم و مانع عنهم اي مظاهر للحياة الكريمة؟؟ عشان مختلفين معاك في المذهب؟؟ طيب لما انت مش متفق مع ناس زيك من مذهب واحد ازاي حتتفق مع ناس مختلفة عنك كلية؟؟
و ازاي تكيل بمكيالين يا جنابك؟؟
مش ده اسمه نفاق ولا ايه بالظبط؟؟
الحقيقة عجبت عجبا لكن اكثر حاجة عجبتني و رفعتلي حواجبي لمنابت شعري هي الجملة التالية
"
و تدعو مبادرة السلام التي قدمتها السعودية عام 2002 الى اعتراف العرب باسرائيل و اقامة علاقات كاملة معها مقابل انسحاب اسرائيل من الاراضي المحتلة.
"
سمعني سلام لابو سوسو الف مرة
السعودية
بتدعو
لمبادرة سلام
و كماااااااااااااان لاسرائيل؟؟
الله يرحمك يا سادات ، والله ما عارفة اعمل ايه، اعيط عليك و لا اعاتبك، لنا يوم مع رب اسمه كريم

اتفرج يا سلام

7 comments:

Cleo said...

الحقيقة أول مرة أقرأ الكلام ده.. وما أخبيش عليك .. أنا كمان حواجبى ارتفعت لمنبت قفايا!!! السعودية اللى بتكفر أو تخطئ كل واحد يخالف تعاليمها "الاجتماعية" وليس حتى الدينية!! لو ما كانتش الست تلبس زى أى واحدة من السعودية (خيمة سودا وملاية سرير على وشها) تبقى سافرة.. لو مش كل راجل ربى دقنه يبقى هاجر للسنة... وكله بدون دليل... مرجعهم فى كل فتاويهم ولا القرآن ولا السنة... نبيهم اللى اختاروه ابن باز وابن عثيمين المنزهين عن كل خطأ..

يا جدعان حد يجيبلى دليل واحد من القرآن ولا السنة ولا حتى السلف الصالح إن قيادة المرأة للسيارة حرام وركوبها مع السواق الهندى ولا الفلبينى حلال!!!!

lastknight said...

أبو سوسو ... سوسو
و حبايبا أبو سوسو .. سوسو
براميل الزيت ... زيت
و الغطره و الزى الموحد و طمس الشخصيه .. صيه
و كيس الزباله الأسود للحريم و النقاب ابو عبن واحده .. آحده
و الالف و خمسميت جلده على شرف مدمنة الخدرات ... رااات
و انا و انت
رقصنى يا جدع


هاهاهاه .. أنتى بتستعبطى يا حفصه ؟ تستغربى ده ايه ؟ أنتى مش واخده بالك ان الترول سعره بيتمرجح و ان 80% من الودايع اللى فرقعت بح خلاص فى الأزمه الماليه مملوكه للسعوديين ؟ يعنى لازم شوية محلسه لجل اليومين السود اللى داخلين عليهم

سيبك انتى .. ايه رأيك فى سلام ابو سوسو ؟

^ H@fSS@^ said...

كليو
معلش يا حبيبتي مكنش قصدي اضايقك
بس شكلنا لو فضلنا متعجبين انا لمنبت شعري و انتي لمنبت قفاكي حنصلع يا اختاه و ده مش كويس في حقنا
المثال اللي ذكرتيه ده له تفسير
ان اهل السعودية مش بيعتبروا ان الفلبيني و الهندي رجالة الا في حالات خاصة فقط مؤكد انتي فاهماني فيها
هما حيجيبلوك دليل من طريقة الدليل قالولوا



الفارس الاخير
سلام ابو سوسو كان ميه ميه مأصل و معمول فيه واجب جامد اوي
مؤكد انت عارف مين ابو سوسو و اتقاله ايه و فين، صح؟؟
تخيل انا فعلا كان غايب من بالي حكاية فرقعة الودائع دي و ان الخطبة دي لزوم المحلسة
طيب ده كدا بيريز طلع نابه على شونة
هو بيقله ارجو ان صوتكوا هو يكون الصوت الغالب و اعتقد انه يمكن يقبضلوا قرشين حلوين
مسكين
يلا هني سعيد بسعيدة

تحياتي

lastknight said...

لأ بيريز مش نأبه على شونه ولا حاجه .. مازالت أرصدة السعوديه بعد الودايع اللى فرقعت أكبر رصيد نقدى فى العالم .. و مازالت أكبر دوله ريعيه فى العالم برضه .. و مازالت أكبر دوله فى الخليج .. و الجزء الشمالى الشرقى منها المتاخم للحدود العراقيه صالح تماما للزراعه !!! تخيلى ؟
يعنى الحايه مشاريع جاهزه ناقصها شوية لا مؤاخذه تسامح و اسمالله على مقامك انفتاح على العالم الخارجى .. و يبقى الفرات اتحول صح لخدمة أسرائيل
بالأضافه طبعا للموقف الموحد ن أيران و حزب الله .. يعنى السعوديه أنسب قاعده لمهاجمة أيران و اللى منها
أصحى يا حفصه الناس دى مابتهزرش

^ H@fSS@^ said...

اصحي يا حفصة
طيب يعني اعمل ايه
انا عارفة ان لو ايران و السعودية حبوا يهزروا مع بعض انا الي حتفجر في النص
و احمقي سجاد متخلف
و عندنا هنا قاعدة امريكية لو فكروا يقولوا يا بسم الله حكون خلاص في خبر كان
حسبي الله و نعم الوكيل فيهم

أبوشنب said...

مالك انتي يا ستي بالكلام ده كله

خليكي في حالك

لأحسن ابلغ عنك

^ H@fSS@^ said...

اهلا يا ابو شنب
ده المفروض اعتبره تهديد ولا هزار؟؟
حدد
افصح
ابن عن نيتك